GHASIA ZA KISIASA BURUNDI:- Raia 60 wasafirishwa kutoka Kituo cha Mapokezi cha Kasange wilayani Ngara mkoani Kagera na kupelekwa Kambi ya Wakimbizi ya Nyarugusu wilayani Kasulu Mkoani Kigoma kupewa hifadhi.

Raia 60 wa Burundi wamesafirishwa kutoka Kituo cha Mapokezi cha Kasange wilayani Ngara mkoani Kagera na kupelekwa kwenye Kambi ya Wakimbizi ya Nyarugusu wilayani Kasulu Mkoani Kigoma kupewa hifadhi.

Mkuu wa wilaya ya Ngara Bw Constantine Kanyasu (Pichani akiongea na Wanahabari ) amesema Raia hao wa Burundi wamesafirishwa jana na Shirika la Umoja wa Mataifa linalowahudumia Wakimbizi, UNHCR kwa ajili ya kupewa Hifadhi kwenye Kambi ya Nyarugusu

Amesema kuwa kwa leo wamepokelewa Raia watano wa Burundi wanaoomba Hifadhi nchini ambao wamehifadhiwa kwenye kituo cha Kuwapokelea katika Kijiji cha Kasange

Bw Kanyasu amewataka wakazi wa wilaya hiyo kuhakikisha wanatoa taarifa kwa viongozi wao pindi watakapobaini kuwepo kwa wakimbizi katika maeneo yao ili taratibu za kisheria za kuwatambua ziweze kuchukuliwa kuliko kuwahifadhi na kujikuta wakiathiliwa na watu hao.

Pichani ni Viongozi wa Kamati ya Ulinzi na Usalama mkoani Kagera ilipofanya ukaguzi wa mpaka wake wilayani Ngara na nchi jirani ya Burundi ili kujiridhisha na taarifa za kuingia kwa wakimbizi kutoka nchini humo wanaodaiwa kukimbia maandamano ya kisiasa.

Katika hatua nyingine, Baadhi ya Raia wa Burundi waliopewa Hifadhi kwenye Kambi ya Wakimbizi ya Nyarugusu wilayani Kasulu Mkoani Kigoma wameishukuru Serikali ya Tanzania kwa kuwapatia hifadhi hiyo.

Raia hao wa Burundi wameziomba nchi nyingine kuiga mfano wa Ukarimu wa Watanzania na Serikali yao kwa kuwa sio mara ya kwanza kuwapokea raia wa mataifa mengine na kuwapa hifadhi na hivyo kuokoa maisha yao kutokana na machafuko yanayojitokeza kwenye nchi zao.

Mmoja wa waomba hifadhi hao Bi Adelina Venguruzi ameiomba Serikali ya Tanzania kuingilia kati na kushauriana na viongozi wa Burundi ili kunusuru maisha ya watu kutokana na machafuko yanayoendelea nchini humo.

Radio Kwizera ikiwa Kambini Nyarugusu imeshuhudia Mabasi na Malori ya Shirika la Umoja wa Mataifa linalowahudumia Wakimbizi, UNHCR yakiendelea kuwapeleka waomba hifadhi hao Kambini humo wakitokea nchini Burundi.

Wakati huo huo Rais Pierre Nkurunziza wa Burundi amewasilisha Nyaraka zake kwa Tume ya Uchaguzi nchini humo, CENI ili kujiandaa na Kampeni za Uchaguzi Mkuu utakaofanyika mwezi June mwaka huu 2015.

Rais Nkurunziza amewasilisha Nyaraka hizo hapo jana pamoja na Faranga Milioni 15 za Burundi kwa Tume hiyo ya Uchaguzi na kuthibitisha rasmi kuwa atawania Muhula wa Tatu wa Urais kwenye Uchaguzi ujao

Hayo yanajiri wakati Maandamano na ghasia za kupinga asiwanie Muhula wa Tatu wa Uongozi kwenye uchaguzi ujao vikiendelea katika maeneo mbalimbali ya nchi hiyo.

Mwandishi wa Radio Kwizera Mjini Bujumbura nchini Burundi amesema Mandamano na ghasia zinazoendelea nchini humo zimesababisha vifo vya Watu 15 hadi sasa.

Source:-Radio Kwizera FM.