Membe Mgeni Rasmi Uzinduzi Wa Maadhimisho Ya Wiki Ya Ukombozi Barani Afrika.

 

Mkurugenzi wa Idara ya Habari MAELEZO Assah Mwambene akizungumza na waandishi wa habari (hawapo) ndani ya ukumbi wa Idara ya Habari MAELEZO leo jijini Dar es Salaam, kushoto ni Msahuri,kumbukumbu za ukombozi wa Barani  Afrika,Daniel Ndagala, Mshauri na mtafiti UNESCO Phelippe Roisse na  wa mwisho ni Dinah Mumbaga Mtafiti na mshauri wa UNESCO.(Picha na Avila Kakingo). 

WAZIRI wa Mambo ya nje na ushirikiano wa kimataifa Mh.Bernard Membe anatarajiwa kuwa mgeni rasmi  katika uzinduzi wa maadhimisho ya   wiki ya Ukombozi Barani Afrika, maadhimisho hayo yatazinduliwa katika ukumbi wa  mikutano wa Makumbusho ya Taifa jijini Dar es Salaam Mei 25 mwaka huu.

 Hayo yamesemwa na Mkurugenzi wa Idara ya Habari MAELEZO Assah Mwambene wakati akizungumza na waandishi wa habari jijini Dar es Salaam leo kuhusiana na maadhimisho hayo ya  wiki ya  Ukombozi Barani Afrika.

Mwambene amesema kuwa  Serikali ikishirikiana na  shirika la  Umoja wa mataifa linaloshughulikia Elimu, Sayansi na Utamaduni (UNESCO), watazindua Mradi wa Nyaraka za Urithi wa Tanzania(TAHAP), ambao ukikamilika utakuwa unaweka na kutunza kumbukumbu za nyaraka  mbalimbali zinazohusu Ukombozi Barani Afrika.

Amesema kuwa miongoni mwa matukio muhimu katika maadhimisho hayo ni pamoja na mdahalo unahohusu mchango wa vyama vya siasa katika harakati za  ukombozi utakaoongozwa na Dk. Salim Ahmed Salim, Profesa  Issa Shivji pamoja na Mh.Ibrahim Kaduma.