Burundi Na Vita Vya Ndani Tena

 

Kiongozi wa chama cha upinzani cha FNL nchini Burundi Bw. Agathon Rwasa

Kiongozi wa chama cha upinzani cha FNL nchini Burundi amesema nchi hiyo ya Afrika Mashariki inakaribia kutumbukia tena kwenye vita vya ndani na ameitaka jamii ya kimataifa kuingilia kati ili suala hilo lisitokee. 

Akizungumza kwenye mahojiano maalumu mapema hii leo, Agathon Rwasa amesema jeshi la Burundi linaonekana kugawanyika baada ya tangazo lililotolewa hapo jana na Jenerali Godefroid Niyombare, kwamba ameipindua serikali ya Rais Pierre Nkurunziza. 

Bw. Rwasa amesema iwapo mapinduzi ya kijeshi yanayoendelea yatakosa kufanikiwa na Rais Nkurunziza akarudi madarakani na kudhibiti hali ya mambo, kiongozi huyo atahitajika kutumia fursa hiyo kufungua milango ya mazungumzo badala ya kutumia mkono wa chuma dhidi ya mahasimu wake. 

Kiongozi wa chama cha FNL pia amesema iwapo mapinduzi yatafanikiwa, wafanyamapinduzi watapaswa kujumuisha Warundi wote katika mchakato wa kurudisha utawala wa sheria haraka iwezekanavyo.